(កំពង់ចាម) កម្លាំងសមត្ថកិច្ច នៃកងរាជអាវុធហត្ថខេត្តកំពង់ចាម នៅថ្ងៃទី១៤ ខែមករា ឆ្នាំ២០២៥ នេះ បានចុះប្រតិបត្តិការបង្ក្រាបបទល្មើសគ្រឿងញៀនមួយករណី ឈានទៅឃាត់ខ្លួនជនសង្ស័យពីរនាក់ នៅចំណុចភូមិតាណេង សង្កាត់ សំបួរមាស ក្រុងកំពង់ចាម ខេត្តកំពង់ចាម ។

បើតាមមន្ត្រីអាវុធហត្ថបានឲ្យដឹងថា កិច្ចប្រត្តិបត្តការបង្ក្រាបករណីជួញដូរដោយខុសច្បាប់នូវសារធាតុញៀនខាងលើ គឺកម្លាំងជំនាញ មន្ទីរស្រាវជ្រាវ និងបង្រ្កាបបទល្មើសកងរាជអាវុធហត្ថខេត្តកំពង់ចាម បានសហការជាមួយកម្លាំងមូលដ្ឋាន កងរាជអាវុធហត្ថក្រុងកំពង់ចាម និងបានចុះបង្រ្កាបករណីជួញដូរដោយខុសច្បាប់នូវសារធាតុញៀន ជាលទ្ធផល សមត្ថកិច្ចយើងធ្វើការឃាត់ខ្លួនជនសង្ស័យបាន ០២ នាក់។

មន្ត្រីដដែលបានឲ្យដឹងទៀតថា ក្នុងប្រតិបត្តិការនោះ កម្លាំងសមត្ថកិច្ច បានដកហូតវត្ថុតាងសរុបរួមមាន÷ ម្សៅក្រាមសថ្លាចំនួន ០១ កញ្ចប់ទម្ងន់ ៤.១១ក្រាម ថ្លឹងទាំងសំបកថង់ -ទូរសព្ទដៃចំនួន ០៤ គ្រឿង(Oppo ០៣គ្រឿង អាយផេត ០១គ្រឿង) ឧបករណ៍សេពគ្រឿងញៀន មួយចំនួន។ បច្ចុប្បន្នជនសង្ស័យ និងវត្ថុតាង ត្រូវបានបញ្ជូនមកបញ្ជាការដ្ឋានកងរាជអាវុធហត្ថខេត្តកំពង់ចាមដើម្បីបន្តចាត់ការតាមនីតិវិធី៕