(កំពង់ចាម) កម្លាំងសមត្ថកិច្ចនគរបាលស្រុកចំការលើ នៅថ្ងៃទី ២៨ ខែធ្នូឆ្នាំ ២០២៤ បានបើកប្រតិបត្តិការស្រាវជ្រាវបង្ក្រាប ករណីធ្វើឲ្យខូចខាតដោយចេតនាមានស្ថានទម្ងន់ទោស(ដោយប្រេីប្រាស់អាវុធកែច្នៃ កាំភ្លេីងខ្យល់បាញ់គ្រាប់កង់) ប្រព្រឹត្តសកម្មភាពដោយក្រុមក្មេងទំនេីង។

មន្ត្រីនគរបាលបានឲ្យដឹងថា នៅថ្ងៃទី២៦ ខែធ្នូ ឆ្នាំ២០២៤ ប៉ុស្តិ៍នគរបាលរដ្ឋបាលស្ពឺ បានទទួលពាក្យបណ្តឹង ពីឈ្មោះ កែម សោពៃ ភេទប្រុស អាយុ៣៤ឆ្នាំ ជាតិខ្មែរ មានទីលំបច្ចុប្បន្ននៅភូមិត្រពាំងសង្កែ ឃុំគគីធំ ស្រុកបារាណ៍ ខេត្តកំពង់ធំ ដោយបានប្តឹងពីជនមិនស្គាល់អត្តសញ្ញាណបានធ្វេីសកម្មភាព យកកាំភ្លើងកែច្នៃបាញ់មកលើរថយន្តរបស់ខ្លួនបណ្តាលអោយបែកកញ្ចក់ ហើយផ្លាតគ្រាប់ត្រូវសៀតផ្កាផ្នែកខាងឆ្វេងរងរបួសស្រាល កាលពីថ្ងៃដដែល វេលាម៉ោង២០:១៦នាទីយប់ ខណៈពេលដែលឈ្មោះកែម សោពៃ និងប្រពន្ធបានជិះរថយន្តម៉ាកលីប្រូពាក់ផ្លាកលេខ កំពង់ធំ 2B.3228 ចេញពីផ្លូវបេតុងខាងត្បូងវត្តពព្រេ ហើយបត់ឡើងផ្លូវកៅស៊ូស្រាប់តែមានជនមិនស្គាល់អត្តសញ្ញាណបាញ់ដោយកាំភ្លើងកែច្នៃចេញពីចេតីយ៍កែងរបងវត្តជ្រុងខាងកើតឈាងខាងត្បូងបណ្តាលអោយបែកកញ្ចក់រថយន្ត ភ្លាមនោះខ្លួនបានបើករថយន្តចេញពីកន្លែងកើតហេតុ និងបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្ពឺតែម្តង។

មន្ត្រីដដែលបានឲ្យដឹងទៀតហើយ ក្រោយពីទទួលបានបណ្តឹង កម្លាំងជំនាញ បានចុះទៅដល់កន្លែងកើតហេតុដើម្បីធ្វើការស្រាវជ្រាវកំណត់មុខសញ្ញា លុះរហូតដល់ថ្ងៃទី២៨ ខែធ្នូ ឆ្នាំ២០២៤ ជំនាញផែនការងារនគរបាលព្រហ្មទណ្ឌ បានសហការជាមួយជំនាញអធិការដ្ឋាននគរបាលស្រុកចំការលេី ដឹកនាំដោយលោកឧត្តមសេនីយ៍ត្រី អុិត ដារ៉ា ស្នងការរងទទួលផែនការងារនគរបាលព្រហ្មទណ្ឌ បានបន្តចុះធ្វេីការស្រាវជ្រាវ សិក្សាស្វែងរកកំណត់មុខសញ្ញា លុះដល់វេលាម៉ោង12 និង20នាទី ថ្ងៃខែដដែល សមត្ថកិច្ចជំនាញបានកំណត់អត្តសញ្ញាណ និងនាំខ្លួនមុខសញ្ញា ម្នាក់ឈ្មោះ ជឹម ជួន ភេទប្រុស អាយុ២៣ឆ្នាំ ជាតិខ្មែរ មានទីលំនៅភូមិស្ពឺកេីត ឃុំស្ពឺ ស្រុកចំការលេី ជាមុខសញ្ញាគ្រឿងញៀន មកធ្វេីការសាកសួរ។

តាមចម្លេីយសារភាពរបស់ឈ្មោះ ជឹម ជួន បានឆ្លេីយសារភាពថា ខ្លួន និង ឈ្មោះ សៀង កុសល់ ភេទប្រុស អាយុ២១ឆ្នាំ ជាតិខ្មែរ មានទីលំនៅភូមិពែងមាសត្បូង ឃុំស្ពឺ ស្រុកចំការលេី ពិតជាបានធ្វេីសកម្មភាព ជិះម៉ូតូជាមួយគ្នា ទៅផ្លូវកៅស៊ូ នៅចំណុចរកែងរបងវត្តពព្រេង ជ្រុងខាងកេីត ឈាងខាងត្បូង ដោយឈ្មោះ សៀង កុសល់ ជាអ្នកធ្វេីសកម្មភាពយកកាំភ្លេីងកែច្នៃបាញ់គ្រាប់កង់ បាញ់សំដៅកញ្ជក់រថយន្តដែលកំពុងធ្វេីដំណេីរ ចំណែកខ្លួនជាអ្នកអង្គុយចាំលេីម៉ូតូ ក្រោយធ្វេីសកម្មភាពរួចខ្លួនទាំងពីរនាក់បានជីះម៉ូតូចេញម្តង។

យោងតាមចម្លេីយសារភាពរបស់ឈ្មោះ ជឹម ជួន ខាងលេី សមត្ថកិច្ចយេីងបានបន្តឃាត់ខ្លួនមុខសញ្ញាម្នាក់ទៀតឈ្មោះ សៀង កុសល់ ភេទប្រុស អាយុ២១ឆ្នាំជាតិខ្មែរ មានទីលំនៅភូមិពែងមាសត្បូង ឃុំស្ពឺ ស្រុកចំការលេី ជាមុខសញ្ញាគ្រឿងញៀន នៅចំណុចតាមបណ្តោយផ្លូវ៧១C ស្ថិតក្នុងភូមិបន្ទាយជ័យ ឃុំស្ពឺ ស្រុកចំការលេី ខេត្តកំពង់ចាម។

ដោយមានការឯកភាពពីលោក វង្ស ប៊ុនវិសុទ្ធ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម សមត្ថកិច្ចយេីងបានឃាត់ខ្លួនជនសង្ស័យទាំង ០២នាក់ខាងលេី មកធ្វេីការសាកសួរ និងចង់ក្រងសំណុំរឿងតាមនីតិវិធី នៅអធិការដ្ឋាននគរបាលស្រុកចំការលេី។
ជនសង្ស័យទាំង២នាក់ លទ្ធផលធ្វើតេស្តរកសារធាតុញៀន (វិជ្ជមាន)ទាំងពីរនាក់តែម្តង៕