ភ្នំហាន់ជ័យមានឈ្មោះជាផ្លូវការថាភ្នំជ័យគិរីដែលមានទីតាំងស្ថិតនៅទិសខាងកើតនៃខេត្តកំពង់ចាម និងប៉ែកខាងលិចទន្លេមេគង្គ ។ ភ្នំនេះមានកំពស់ ៦៣ម៉ែត្រ ស្ថិតនៅក្នុងភូមិហាន់ជ័យ ឃុំហាន់ជ័យ ស្រុកកំពង់សៀម ខេត្តកំពង់ចាម មានចម្ងាយ ១៨គ.ម តាមផ្លូវទឹក និងតាមផ្លូវគោកមានចម្ងាយ ២០គ.ម ពីទីរួមខេត្តកំពង់ចាម ។ នៅលើភ្នំនេះមានព្រះវិហារ និងប្រាសាទគុកខាងត្បូង ស្ថាបនាឡើងអំពីឥដ្ឋតាន់បុរាណ ដែលមានទំហំ ៧ម៉ែត្របួនជ្រុង និងកំពស់ ១២ម៉ែត្រ កសាងឡើងក្នុងសតវត្សទី៧ ក្នុងរជ្ជកាលព្រះបាទឦសានវរ្ម័នទី ១ បច្ចុប្បន្នប្រាសាទនេះមានលក្ខណៈទ្រុឌទ្រោមទៅហើយ។