កំពង់ចាម​៖នៅព្រឹក​ ថ្ងៃទី​២៧​ខែមករា​ ឆ្នាំ​២០២៥​ ឯកឧត្តម​ គន់​ សុភា​ អភិបាលរងនៃគណៈអភិបាលខេត្តកំពង់ចាម​ តំណាង​ ឯកឧត្ដម​ អ៊ុន​ ចាន់ដា​ អភិបាលខេត្តកំពង់ចាម​ បានអញ្ជេីញ​ចូលរួម​ពិធីប្រគល់-ទទួល​គ្រឿងចក្រ២គ្រឿង​ និងរថយន្តដឹកសំរាមមួយគ្រឿង​ ពីគម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤ ក្រោមកម្ចីឥណទានសម្បទាន ពីធនាគារអភិវឌ្ឍន៍អាស៊ី​តាមរយៈ​ ក្រសួង​សាធារណការ​ និង​ដឹក​ជញ្ជូន​។

តំណាងក្រសួង​សាធារណការ​ និង​ដឹក​ជញ្ជូន​ លោក​ នុប​ រ៉ូបឺត ប្រធានគ្រប់គ្រងគម្រោងប្រតិបត្តិការថែរទាំនៃគម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤​ បានឲ្យដឹងថា​ គ្រឿងចក្រ​និងរថយន្ត​ទាំងបីនេះ​ គឺស្ថិតក្នុងរង្វង់ប្រតិបត្តិការ​ក្រុមហ៊ុនBM ដែលជាក្រុមហ៊ុនសាងសង់ទីលានទុកដាក់សំរាមក្រុងកំពង់ចាម​ ក្នុងរយៈពេល​ពេញ១ឆ្នាំ​។

គូសបញ្ជាក់ថា ទីលានទុកដាក់សំរាមក្រុងកំពង់ចាមនេះត្រូវបានសម្ពោធដាក់ឲ្យដំណើរការជាផ្លូវការ នៅថ្ងៃទី២៤ ខែធ្នូ ឆ្នាំ២០២៤កន្លងទៅនេះ។ ទីលានទុកដាក់សំរាមក្រុងកំពង់ចាមនេះស្ថិត​ក្នុងគម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤ ក្រោមកម្ចីឥណទានសម្បទាន ពីធនាគារអភិវឌ្ឍន៍អាស៊ី ត្រូវបានសាងសង់រយៈពេល១៧ខែ ដោយគិតចាប់ពី ថ្ងៃទី០៥ ខែមករា ឆ្នាំ២០២៤ ទីលានទុកដាក់សំរាមត្រូវបានសាងសង់លើផ្ទៃដីទំហំ ១៨,៦៨ហិកតា ស្ថិតនៅក្នុងភូមិកោះរកា ឃុំកោះរកា ស្រុកកំពង់សៀមដែលមានចម្ងាយប្រហែល២៥គីឡូម៉ែត្រ ពីក្រុងកំពង់ចាម៕